1-هادا واحد الطبيب غادي لاجتماع ديال الأطباء، وكتب دغية ف الليل داكشي اللي غادي يقول ف ورقة.
الغد ليه، ملي طلع للمنصة يهدر، ما قدرش يقرا داكشي اللي كتبو ف الليل. عيا ما يشوف، ما فهم والو ف الكتبة ديالو.
وهو يسول الحاضرين: الله يخليكم كاين معانا شي صيدلي ف القاعة؟
2-هادا واحد الولد ما مشاش للمدرسة. كان جدو كيطل من الشرجم، وبان ليه المعلم جاي لعندهوم للدار، وهو يمشي يجري عند الدري قال
ليه: تخبى تخبى، المعلم جا يسول عليك.
وهو يقول ليه الدري: وا تخبى نتا أجدي، راه قلت ليه جدي مات وجا يعزينا فيك.
3-قالوا ليه : نوض تخدم
قال ليهم : علاش؟
قالوا ليه : باش دير الدار
قال ليهم : علاش؟
قالوا ليه : باش تزوج
قال ليهم : علاش؟
قالوا ليه : باش دير وليدات
قال ليهم :علاش؟
قالوا ليه : باش يخدموا عليك
قال ليهم :علاش؟
قالوا ليه : باش ترتاح
قال ليهم : راني هاكا مرتاح، علاش ندور هاد الدورة كاملة؟
4-واحد السيد صمك كان جالس حدا واحد الطيابة.
خلاها حتا ناضت باش تسخر، وهو يسرق ليها دجاجة، ودارها في قبو...
ملي رجعت الطيابة، قالت ليه : السلام عليكم
و هو يقول ليها : إينا دجاجة لهلا يطيح علينا شي باطل
الجمعة مايو 24, 2024 1:54 pm
